2019 മാർച്ച് 9 തീയതി പ്രശസ്ത ജ്യോതിഷ പണ്ഡിതൻ ശ്രീ ഇടവട്ടം ഗോപിനാഥൻ മുഖ്യ ജ്യോൽസ്യനായും , ജ്യോൽസ്യൻ പെരുമ്പുഴ ഇല്ലത്തു ശ്രീ മുരളീധരൻ നമ്പൂതിരിയുടെ സാന്നിദ്ധ്യത്തിലും ദേവി സന്നിധിയിൽ ദേവ പ്രശനം നടന്നു

രാമപുരത്ത് കൊണ്ടാടുനിന്ന് കണ്ടെടുത്ത ബുദ്ധപ്രതിമയുടെ ശിരസ്സ് നേരിൽ കാണുന്നതിനായി പോയിരുന്നു. പള്ളിക്കണ്ടം എന്നറിയപ്പെടുന്ന വയൽപ്രദേശത്തിന്റെ കിഴക്കേ ചെരുവിൽ ചെറിയ കൈത്തോട് കടന്നുപോകുന്നതിനോട് ചേർന്ന് പുരയിടത്തിന്റെ കയ്യാല കല്ലു കെട്ടുന്നതിനിടെയാണ് ഇത് കണ്ടെത്തിയത്. പഴയ കയ്യാലക്കെട്ട് പൊളിച്ചപ്പോൾ അതിൽനിന്നു കിട്ടിയ ഈ ശിലാഖണ്ഡത്തിന്റെ രൂപം ശ്രദ്ധിച്ച തൊഴിലാളികൾ വീട്ടുകാരുടെ ശ്രദ്ധയിൽ പെടുത്തിയതാണ്. വർഷങ്ങൾക്ക് മുമ്പ് ഇവിടെ നിന്ന് ലഭിച്ച പൂർണ്ണാകായമായ ബുദ്ധപ്രതിമ തൃശൂർ മ്യൂസിയത്തിൽ സൂക്ഷിച്ചിട്ടുണ്ട്. അത് അക്കാലത്ത് വിദഗ്ധപഠനം നടത്തി ബുദ്ധനാണെന്ന് സ്ഥിരീകരിച്ചതുമാണ്. ഈ ബുദ്ധശിരസ്സ് കിട്ടിയതിന്റെ 150 മീറ്റർ പടിഞ്ഞാറ് മാറി തോട്ടിൽനിന്നാണ് അന്ന് ആ ബുദ്ധപ്രതിമ കിട്ടിയത്. അതിന്റെ കൈപ്പത്തി നഷ്ടപ്പെട്ട നിലയിലായിരുന്നു. ഇപ്പോൾ കണ്ടെടുത്ത ബുദ്ധപ്രതിമയിൽ കേശാലങ്കാരമാണ് പ്രത്യേകം ശ്രദ്ധിക്കപ്പെടുന്നത്. മുഖത്ത് കണ്ണ്, മൂക്ക്, ചുണ്ട് ഒക്കെയും കൊത്തി മാറ്റിയിരുന്നതിനാൽ അവ്യക്തമാണ്. ഒരു പക്ഷേ പഴയ കയ്യാല കെട്ടിയ സമയത്ത് ഉടച്ചുമാറ്റിയതാവാം. അതല്ലെങ്കിൽ വിഗ്രഹം ഉപേക്ഷിച്ച കാലത്ത് വികൃതപ്പെടുത്തിയതുമാകാം. ക്ഷേത്രങ്ങളിലെ പുന:പ്രതിഷ്ഠാ സമയത്തോ മൂർത്തീസങ്കല്പങ്ങൾ മാറുമ്പോഴോ ചൈതന്യ രഹിതമാക്കപ്പെട്ട പഴയ വിഗ്രഹങ്ങൾ പുഴയിൽ നിമജ്ജനം ചെയ്യുക എന്ന പതിവുണ്ട്. ഇവിടെയും അത്തരത്തിൽ സംഭവിച്ചതാകാം. ഈ പ്രതിമയുടെ പിൻഭാഗത്ത് കൊത്തിയെടുത്ത ഭാഗം അപൂർണ്ണമായി കാണുന്നതിനാലും പിന്നിലേക്ക് കൂടുതൽ ഭാഗങ്ങൾ ഉള്ളതിനാലും പിൻഭാഗത്ത് ശിലാഫലകം വരുന്ന നിലയിൽ ഒറ്റക്കല്ലിൽ കൊത്തിയതാവാം എന്നു കരുതുന്നു. മിക്കവാറും ബുദ്ധപ്രതിമകളിൽ കേശാലങ്കാരം ചുരുൾമുടിയായാണ് കാണപ്പെടുന്നത്. അതിനെ പറ്റിയുള്ള ഒരു ഐതിഹ്യം രസകരമായി തോന്നി. യഥാർത്ഥത്തിൽ അത് മുടിച്ചുരുൾ അല്ലത്രേ. തന്റെ ശിഷ്യന്മാരെപ്പോലെ തന്നെ മുണ്ഡനം ചെയ്ത ശിരസ് തന്നെയായിരുന്നു ബുദ്ധനും! സർവ്വസംഗപരിത്യാഗിയായപ്പോൾ തന്റെ നീണ്ട മുടിമുറിച്ച് കളഞ്ഞു. കടുത്ത വെയിലേറ്റ് സന്യസിച്ചിരുന്ന വേളയിൽ തലയ്ക്ക് തണുപ്പേകാനായി ഉരുണ്ട ഒച്ചുകൾ ബുദ്ധന്റെ ശിരസിൽ കയറി ഒട്ടിയിരുന്നുവത്രെ. ഇത്തരത്തിൽ 108 ഒച്ചുകൾ ശിരോലങ്കാരമായി ചേർന്നിരുന്നതാണ് ശില്പികൾ മുടിക്കെട്ടായി ചിത്രീകരിച്ചിരുന്നത്. ഇതൊരു കഥ. രാമപുരത്ത് വാമൊഴിയായി നിലനിന്നു വരുന്ന വിവരമനുസരിച്ച് പള്ളിയാൻ വാണ നാട് എന്നാണ് അറിയുന്നത്. കൊണ്ടാട് ധർമ്മശാസ്താ ക്ഷേത്രം പ്രദേശത്തെ ബുദ്ധമത സ്വാധീനത്തിന്റെ വ്യക്തമായ തെളിവാണ്. മീനച്ചിലാറിന്റെ കൈവഴിയായ ളാലം തോട്ടിലേയ്ക്ക് ചേരുന്ന രാമപുരത്തെ ഈ തോട് കടന്നുപോരുന്ന പള്ളിക്കണ്ടത്തിന് പടിഞ്ഞാറായി കൊക്കരണി എന്ന അത്യഗാധമായ ഒരു കുളമുണ്ട്. അതിനോട് ചേർന്ന് ഒരു ദുർഗ്ഗാലയവും. തെക്കേക്കാവ് എന്നറിയപ്പെടുന്ന ഈ ക്ഷേത്രം കൂടാതെ ശാസ്താക്ഷേത്രത്തിന് വടക്കായി മറ്റൊരു വടക്കേക്കാവ് ദേവീക്ഷേത്രവുമുണ്ട്. രണ്ടും കാരിക്കോട്ട് മനയുടെ കീഴിലാണ്. പള്ളിക്കണ്ടത്തിനും കൊക്കരണിക്കും സമീപത്തായി വടക്കുംകൂർ രാജാവിന്റെ കുതിരലായം ഉണ്ടായിരുന്നുവത്രെ. ളാലം കർത്താവിന്റേതെന്നു മറ്റൊരു ഭാഷ്യം. പള്ളിക്കണ്ടത്തിന് തെക്ക് വെള്ളിലാപ്പള്ളിയിൽ വടക്കുംകൂറിന്റെ ആസ്ഥാനമിരുന്ന സ്ഥലവും സന്ദർശിക്കാനിടയായി. ഒരു കാലത്ത് കിഴക്കൻ പ്രവിശ്യയുടെ ഭരണത്തിനായി വെള്ളിലാപ്പള്ളി ആസ്ഥാനമാക്കി വടക്കുംകൂറിന്റെ ഒരു ശാഖ ഇവിടെ ഉണ്ടായിരുന്നു. പിന്നീട് കടനാട് ആസ്ഥാനമാക്കി മാറ്റുകയാണുണ്ടായത്. കടനാട് വടക്കുംകൂർ കോയിക്കൽ ഇപ്പോഴുമുണ്ട്. രാമപുരം - പാലാ റോഡിൽ വെള്ളിലാപ്പള്ളി ജംഗ്ഷനിൽ പിഷാരികോവിൽ ക്ഷേത്രത്തിന് വടക്കായി ഉയർന്ന സ്ഥലത്ത് വിശാലമായ ഒരു പറമ്പ് ഇപ്പോഴും വെള്ളിലാപ്പള്ളി കൊട്ടാരത്തിന്റെ സ്ഥാനമായി അവശേഷിക്കുന്നു. മഹാശിലായുഗം, ബുദ്ധമതകാലഘട്ടം, ബ്രാഹ്മണ അധിനിവേശം, സ്വരൂപവാഴ്ച്ചക്കാലം, നസ്രാണി കുടിയേറ്റം എന്നീ ചരിത്രസന്ധികൾക്ക് സാക്ഷ്യം വഹിച്ച രാമപുരത്തെ കേരള ചരിത്രപഠനത്തിന് മികച്ച മാതൃകയായി തെരഞ്ഞെടുക്കാവുന്നതാണ്. മലയോര താഴ് വരകളും കരവയലുകളും നീർച്ചാലുകളും മണ്ണിന്റെ ഫലപൂയിഷ്ടതയും ജൈവവൈവിധ്യവും ആദിമമനുഷ്യന്റെ കുടിയേറ്റ കാലം മുതൽ കാർഷികമേഖലയായി അടയാളപ്പെടുത്തിട്ടുണ്ട്. അത്തരത്തിൽ നിരവധി കുടിയേറ്റങ്ങളുടെയും സാംസ്കാരികസങ്കലനങ്ങളുടെയും ബൃഹത്തായ പാരമ്പര്യവും ചരിത്രവും ഈ ദേശത്തിന് അവകാശപ്പെട്ടതാണ്.
- രാജീവ് പള്ളിക്കോണം
https://www.mathrubhumi.com/kottayam/news/pala-1.3649240